लुम्बिनी सांस्कृतिक–३ मा तीनमहिने सिलाइकटाइ तालिम सुरु ,२० जना महिला सहभागी, तालिमपछि सिलाइ मेसिन उपलब्ध गराउने वडाको प्रतिबद्धता

गैंडहवा न्युज
लुम्बिनी, असोज २३ गते । रुपन्देहीको लुम्बिनी सांस्कृतिक नगरपालिका–३ मा महिलालाई सीपमूलक तालिम प्रदान गरी आत्मनिर्भर तथा स्वरोजगार बनाउने उद्देश्यले तीनमहिने सिलाइकटाइ तालिम सुरु भएको छ।
ह्युमन एड फर रिलिफ एन्ड सपोर्टको आयोजना तथा लुम्बिनी सांस्कृतिक नगरपालिका–३ को सहयोगमा सञ्चालित उक्त तालिममा २० जना महिलाको सहभागिता रहेको छ। असोज २३ गतेदेखि सुरु भएको तालिम आगामी पुस २३ गतेसम्म सञ्चालन हुनेछ।
वडा कार्यालयमा आयोजित तालिमको उद्घाटन कार्यक्रम वडा सदस्य रामप्रसाद कुर्मीको प्रमुख आतिथ्यतामा सम्पन्न भएको हो। कार्यक्रममा वडा सचिव राजेन्द्रप्रसाद यादव, स्थानीय प्रतिनिधि तथा तालिममा सहभागी महिलाहरूको उपस्थिति रहेको थियो।
कार्यक्रममा बोल्दै प्रमुख अतिथि कुर्मीले महिलालाई सीपमूलक तालिम प्रदान गर्नु उनीहरूलाई आत्मनिर्भर बनाउने महत्वपूर्ण आधार भएको बताउनुभयो। महिलालाई आवश्यक सीप र अवसर प्रदान गर्न सके आफ्नै खुट्टामा उभिएर परिवारको आर्थिक अवस्था सुधार गर्न सक्ने उहाँको भनाइ थियो।
उहाँले महिलालाई तालिममा सहभागी गराउनु मात्र पर्याप्त नहुने उल्लेख गर्दै सिकेको सीपलाई व्यवहारमा उतारेर आयआर्जनसँग जोड्नुपर्नेमा जोड दिनुभयो। सिलाइकटाइजस्तो व्यावहारिक सीपले महिलालाई घरमै बसेर काम गर्न, आम्दानी गर्न र परिवारको आर्थिक अवस्थामा सुधार ल्याउन सहयोग पुग्ने उहाँले बताउनुभयो।
त्यसैगरी, वडा सचिव राजेन्द्रप्रसाद यादवले सीपमूलक तालिमले महिलालाई रोजगारी तथा आयआर्जनका अवसर सिर्जना गर्न महत्वपूर्ण भूमिका खेल्ने बताउनुभयो। सीपको अभावमा आर्थिक गतिविधिमा सहभागी हुन नसक्ने अवस्थालाई यस्ता तालिमले न्यूनीकरण गर्न सहयोग पुग्ने उहाँको भनाइ थियो।
यादवले सिलाइकटाइको सीप हासिल गरेपछि महिलाले आफ्नै व्यवसाय सञ्चालन गरी स्वरोजगार बन्न सक्ने बताउनुभयो। तालिमबाट प्राप्त ज्ञान र सीपलाई व्यवहारमा प्रयोग गर्न सके महिलाले परिवारको आर्थिक अवस्थामा सुधार ल्याउनुका साथै समाजमा आफ्नो छुट्टै पहिचान स्थापित गर्न सक्ने उहाँले उल्लेख गर्नुभयो।
तीनमहिने तालिममार्फत सहभागी महिलालाई सिलाइकटाइसम्बन्धी व्यावहारिक ज्ञान तथा सीप प्रदान गर्ने लक्ष्य राखिएको छ। तालिम सम्पन्न भएपछि सहभागी महिलालाई सिलाइ मेसिन उपलब्ध गराउने प्रतिबद्धतासमेत वडा कार्यालयले व्यक्त गरेको छ।
सिलाइ मेसिन उपलब्ध भएपछि तालिममा सिकेको सीप प्रयोग गरी कपडा सिलाउने काम सुरु गर्न र स्वरोजगार बन्न सहज हुने अपेक्षा गरिएको छ। तालिमसँगै आवश्यक साधनसमेत उपलब्ध गराउने प्रतिबद्धताले महिलालाई सीप सिकाइमा मात्र सीमित नराखी व्यावहारिक रूपमा आयआर्जनसँग जोड्न सहयोग पुग्ने विश्वास गरिएको छ।
महिलाको सीप विकास, आर्थिक सशक्तीकरण तथा स्वरोजगार प्रवर्द्धनका लागि सञ्चालन गरिएको यस कार्यक्रमले स्थानीय महिलालाई आत्मनिर्भर बन्न प्रेरित गर्ने अपेक्षा गरिएको छ।